Tu si ‘na storia antica

Di Pino Rispo D.R.

‘A luntano te veco, te sento
É tanto tiempo ca te porto
dint’ ‘o core, dint’ ‘a mente,
a primma vista me songo nnamurato,

Ogni notte me sceto
‘a dint’ ‘e suonne appassiunate,
te piantaje dint’ ‘a ‘stu core
tanto tiempo fa,

Te veco d’ ‘a luntano,
pecché nun tenenne cchiú niente me purtaieno ccá,
te veco dint’ ‘e suonne
comm’ ‘a ‘na stella lucente,

‘A muntagna d’ ‘a luntano
quant’é bella ‘nmiez’ ‘o mare,
sí ‘a passione ‘e chisto core,
tu sí ‘a patria, tu sí l’onore,

Te voglio tanto bene,
I’ te vurria stà vicino,
comme a ‘nu criaturo vicino
‘a mamma ogni notte,
ogni matina,

Tu sí ‘na storia antica,
ca fino a ogge tutto ‘o munno ha cantato,
ma nun ha capito buono
‘e pparole ‘e ‘sti canzone,

Ogge sí accumparuta n’ata vota,
e sí sempe ‘na storia antica,
ma si ‘na canzona nova,
ca tante portano dint’ ‘o core,

I’ pe’ te voglio ‘a gloria d’ ‘aiere,
Napule mia… te giuro nu juorno i’ torno,
Luntano ‘a te nun ce ‘a faccio cchiú!
I’ te voglio tanto bene!

IMG_9192.JPG

Advertisements

Figlio ‘e ‘na tragedia

di Pino Rispo d.r

I’ so’ nato a Napule…
‘o Regno d’ ‘e ddoje Sicilie
I’pe’ chesta terra songo n’atu figlio
ma mò stongo luntano ‘n terra straniera

So’ figlio ‘e na tragedia annascunnuta
na storia scunusciuta fino a ajere
accumminciata tantu tiempo fa
e I’ nun me stanco ‘e ve cuntá

Songo uno ‘e chilli figlie sparse p’ ‘o munno
ogge saccio ‘a storia e tengo na sola missione…
chella ca assieme ‘e frate mie
voglio purtá fino nfunno

‘A missione ‘e vedé ‘a terra mia libera
p’ ‘a terra nosta I’voglio ‘a gloria
I’cu tutt’ ‘o core e tutto ll’ammore
voglio purtá luce a chesta storia

No… ‘o Savoia nun venette a liberá
venette invece sulo a conquistá
a appiccià, a arrubbà, a violentà
a piglià senza scuorno tutto l’oro d’ ‘a terra nosta

‘O populo nun tenenne cchiú niente
accuminciaje ‘o ditto e ‘o fatto
“O Brigante o emigrante”
quanta paise appicciate, quanta morte

Pure ‘e prievete cadetteno nzieme a tutte quante
nce fuje ‘na ribbellione ‘e populo
ma senza pietà e senza scuorno c’accedetteno
e p’annasconnere ‘o martirio nce chiammajeno briganti

Chi se salvaie nunn’avenno cchiù niente
cu ‘e llacreme ‘int’all’uocchie e na valigia ‘nmano se ne jette
fuje accussi ca migliar’ ‘e bastimienti
nce purtajeno pe’ terre assaje luntane

“Frato mio” ogge I’ saccio ‘a storia
scunusciuta e annascunnuta fino a ajere
è na tragedia ‘e tantu tiempo fá
ma I’ nun me stanco e ve cuntà!

IMG_0371.JPG